2) 母嬰健康院（產前感想）

今日想講下政府嘅母嬰健康院。 

我住屯門，最近嘅健康院就係湖康診所，屯門診所。兩間我以前都去過門診，因為就自己方便，我揀咗係湖康登記。 

湖康唔大，兩層，一樓街症門診，二樓母嬰健康院。政府機構人流實多，真係日日都好多人睇醫生，好在母嬰健康院由第一次排期(產前服務)開始就會自動約埋下一次產檢覆診，如果要好似街症咁自己打電話預約真係十世都約唔到。 

嚟得都預咗冇1-2個鐘都唔使走，做檢查見姑娘醫生其實真係15分鐘攪掂，只不過人多，唔係得你一個，所以加加埋埋就成個幾兩個鐘。 

第一次去首先登記，窗口文員會俾晒啲資料你，唐氏檢查日期，幾時番嚟產檢，仲有孕婦手冊，當然要填個人資料嘅表格啦。 

登記好就乖乖坐低等叫名，姑娘叫你做乜就做乜，除鞋度高磅重涼血壓驗小便，基本上都自助，你只要報數俾姑娘聽就得。之後就見另一part嘅姑娘，好詳細咁問晒你所有病歷資料就等見醫生，健康院係冇得照聲波架，醫生睇完你排版就叫你瞓上床，拉低條褲+底褲，拉高件衫+胸圍，幫你做檢查，第一次真係O晒咀，冇遮冇奄真係有啲尷尬，雖然大家都係女人，雖然醫生已經做到化咗，不過真係難接受啲，俾條毛巾遮下都好吖，凍親點算？
健康院只係會用胎心機聽BB心跳，正常嘅話就冇咩會同你講，最後俾紙你去攞孕婦維他命同約下一次期就走得。 

見醫生基本上都只係第一次會見，之後嘅產檢姑娘會做晒，冇特別係唔使見醫生，所以第一次時間會耐啲，之後會短小小。直到35週做乙型鏈球菌拭子普及篩查，有人話醫生做，有人話姑娘做，我係健康院就姑娘做，開頭都好緊張，始終要俾人睇陰部同patpat，大家女人都係咁話啦，不過呢個姑娘好有經驗，係第一下有小小痛之外，之後都好ok，唔會點覺得尷尬，同埋態度都好nice，所以呢個檢查感覺ok，冇人地話果啲好唔舒服或者做完之後好痛嘅感覺。 相信經驗同手勢都好重要。 

有人話政府做產檢好hea，都難免嘅，香港居民唔使錢又多人，做得幾多吖？都係做基本檢查啫，冇事冇幹就最好啦。點同你俾成千蚊出私家照，俾得錢都想要Service啦，所以冇得比嘅。 

湖康母嬰健康院俾我嘅感覺真係唔錯，一般嚟講，姑娘個個都好好 (係啲學生/學護真係要多多吸收現任姑娘嘅好態度同經驗)，有問必答，環境清潔。 

唔好嘅反而係啲家長，玩手機正常，我都會，不過可唔可以將聲音關閉呢？要講電話嘅可唔可以行出去講呢？有帶小朋友嚟嘅可唔可以教下小朋友唔好周圍走(始終嚟得嘅9成都係孕婦，撞到嘅話唔係一句對唔住就冇事)，講野盡量將音量收細呢？可唔可以教下小朋友唔好瞓係啲櫈到呢...

一個寧靜舒適嘅環境係人創造出嚟，唔係個個人都想知其他人係度做緊啲咩講緊啲咩架... 

不過呢啲問題唔係淨係得呢度有，好多場所都會發生，如果職員可以留意下，有時出下聲應該會好好多，anyway，就服務而言，我對湖康母嬰健康院印象良好，希望可以一直keep住落去或者做得更好。 

1) Turn over a new leaf

一直想記錄低懷孕歷程，但係一直都冇咁做，點解？因為之前嘅經驗令我只想低調。 

今天懷上稀倬係唔容易嘅一件事，當然，亦係一種緣份。 

仲記得當日係廁所攞住支棒棒，驗完第一下個感覺係有啲諤然，之後即刻叫老公睇，佢同我嘅反應差唔多，外表比較冷靜，實質感到開心，因為今次係BB選擇成為我地呢個家庭嘅一份子。我地都好感恩。 

我地首先做嘅唔係即刻去政府到排期，而係約私家照超聲波，照到有閃閃（BB心跳）果一刻，我真係係醫生面前喊咗出嚟，喜極而泣就係咁嘅心情。 

跟住落嚟就係11週嘅唐氏綜合症檢查（期間我地去健康院排期），我地揀咗安全快速準確度高達99.9%嘅胎兒DNA疾病產前檢查<<敏兒安 safe T21 express測試>> http://www.xcelom.com/?lang=tc，雖然要自己攞錢出嚟做，都唔平，不過除咗T21(唐氏綜合症)，仲可以check埋T13(巴陶氏綜合症)，T18(愛德華氏綜合症)，仲有性染色體異數更加安心。好記得，3日我地就收到電話報告，一切正常，姑娘仲問我想唔想知BB性別，我仲話想自己揭曉，到時自己去醫務所攞報告先睇。 

再嚟就係20週照結構，媽媽界盛傳呢一關就好似打大佬一樣，過咗呢關，已經可以穩定落嚟。特地搵咗個母胎醫學專家，聽聞全港唔超過50個，所以收費都貴，但係，為咗BB，呢啲唔慳得，而且政府冇提供（健康院姑娘好直接話要自己出去照，屯門醫院人手唔夠）其實我地本身都諗住就算政府有得照，我地都會出私家照，因為傳聞政府照得好hea，可能有啲醫院唔係啦，不過呢個都唔係重點喇，重點係我地想安心啲，自己搵個有信心嘅醫生去照會更加放心。 

當日都要照2次，雖然醫生好有耐性，不過BB第一次照唔係太合作呢，要照嘅9成睇晒，雖然我地都睇唔明，不過醫生一直係度講解都OK，醫生話想照清楚啲，叫我係出面行下，唔好摸肚（會宮縮，唔講唔知，之後我一直都唔會點樣摸肚，會輕輕拍下肚，都叫同稀倬有啲互動），第二次照就照晒喇，雖然稀倬只係俾個側面我地睇，不過所有結構都正常，同埋呢個醫生專長係照心臟，佢都話正常，我地更加放心。 

之後政府私家兩邊做產檢，血壓體重驗小便，一直都好順利，雖然中途有好多擔心同負面嘅想法，而且情緒唔係好穩定，可以冇原因咁喊，嚇親老公，我都有懷疑過自己係咪產前抑鬱，可能第一次做媽媽，諗得太多，擔心太多，老公一直都係身邊鼓勵我，叫我有咩大事小事都要同佢講，唔好收收埋埋，講出嚟會舒服啲。好彩有老公係我身邊，有你撐我係心靈支柱。 

經過一連串嘅難關，當然唔可以掉以輕心，始終新手，好多野都唔知，愈近預產期就愈緊張，到達而家足10個月，40週喇，唔知係咪係肚入面太舒服，仲要過期居留，40w3d BB就出世喇，Papa Mama講過，你想用邊種方式出世都唔緊要，Papa Mama都會接受，要準備嘅已經準備好，到時出院BB就可以有個舒適嘅地方成長，希望BB身體健康，其他野都唔重要，有健康嘅身體最緊要。 

稀倬，你要加油呀！ 

Papa Mama會同你一齊加油！ 

愛你！