3) 屯門醫院走佬袋

對於執走佬袋，我用咗好多時間搜集同執拾。 

原來每間醫院（就算政府/私家醫院）都有所不同，我就選擇係屯門醫院分娩，所以專注睇屯門醫院產科嘅要求。健康院姑娘大概30週之後先會俾list你，所以我係網上做咗好多搜集同埋又問下曾經係屯門醫院分娩嘅朋友，最後所得出嘅清單係咁嘅 ↓↓↓↓，我會分3個袋，當然唔係全部拎晒入院啦，我自己覺得劃分得好啲啫，個人需求唔同，純粹個人分享，要啲咩就自行加減啦。 

呢個係我嘅走佬袋，多格背嚢，特登買嘅，多格數同埋之後都會用佢嚟揹BB野，冇想像中咁大，不過可以擺晒我以下嘅用品入去之如仲有空位，都算係咁啦! 不得不提嘅係背嚢兩邊都有拉鍊袋for你擺水樽，其中一邊係有銀面保溫/保冷作用，非常方便👍

✔代表我生完BB之後真係有用到嘅用品 

{A袋}：孕婦入院用品  

文件類： 

1) 母嬰健康院產前覆診記錄咭 ✔

2) 自己身份證 ✔

3) 丈夫身分證 ✔

*副本? 醫院話要正本，但係如果臨時臨急得孕婦自己入院，我覺得老公身分證copy準備定冇壞嘅。 

孕婦用品類： 

1) 產婦衛生巾（黏貼裝） 1包 20塊 ✔

*有人會帶2包，不過我買六甲村，1包已經20塊 

*另外，有醫院會要求孕婦帶有扣裝，主要係for你生完之後職員方便幫你著，最好問番所屬醫院需求。 
*實際經驗：一到產後病房，姐姐幫我墊一張床墊+2塊衛生巾，之後唔會有人幫忙，自己換就得，好在我冇另外再買有扣裝，如果唔係就嘥晒，黏貼裝方便太多。

2) 網褲 6 條 

*朋友話6條都有多，佢自己都只係用咗3條，仲問我要唔要… 

3) 床墊 10 塊 ✔

*呢樣係我好唔明白嘅野，醫院全部病房都有床墊提供，點解去到產科反而要自備？ 有啲政府醫院都有提供，但朋友叫的準備埋，因為啲職員會叫你攞定出嚟。 
*實際經驗：瞓醒之後就要換，惡露頭幾日真係好多。

4) 傷口沖洗瓶 

*順產媽媽生完之後有機會下體有傷口，（無就當然最好），去廁所前裝定啲熟水入去，去完廁所之後清洗傷口用嘅。 
*我開刀，所以唔使用，不過我見其他順產媽媽都有用。

5) 廁所墊紙 20 塊 ✔

*呢樣冇要求帶，只係我比較注重衛生，覺得醫院嘅廁所多菌，唔想下下抺浪費時間，所以自備。
*題外話，我平時出街都有用，好方便，懷孕中媽媽一定要坐，唔可以蹲，所以墊紙係不可缺少嘅物品 。

*實際經驗：由產前用到產後，真心要用，雖然病房廁所都算乾淨，好多媽媽都好衛生，不過唔怕得罪講句，都有一小部份真係好污糟...親眼見到用過嘅染滿惡露衛生巾就咁擺咗係垃圾桶蓋面/洗手盤，仲有好多抺手紙/紙巾係地下，坐廁板有尿液...試諗下如果你係下一手使用者會有咩感覺，所以我每次都不厭其煩咁用酒精消毒再墊墊紙，產婦唔可以蹲低，冇計，希望每個人都有啲公德心啦，人人為我，我為人人吖嘛。（唔好意思，長氣咗啲）

6) 哺乳胸圍 1個 ✔

*諗住餵母乳，哺乳胸圍方便好多，同埋冇鋼線，唔會箍住，舒服好多。 

*實際經驗：我揀咗奶水，不過冇鋼線真係舒服好多。

7) 乳墊 10 片 ✔

實際經驗：生完開始有初乳(唔餵母乳都會有)，BB食到當然最好，不過平時墊一墊都好，唔會整污糟個胸圍。 

8) 內褲 2條 ✔
*實際經驗：唔洗點解釋啦

9) 襪 1對
*保暖，唔好俾腳趾關節入風

10) 紙巾 1盒 ✔

*醫院話帶2卷 
*實際經驗：我個人覺得盒裝方便啲，卷裝如果跌咗落地，相信大家都諗到係點…

11) 萬用紙 20 張 (摺好包起) ✔

*網上啲媽媽話去完廁所用抺手紙唔會有紙碎，用嚟印乾傷口最好
*實際經驗：BB食奶果陣用嚟墊住都好方便，用紗巾嘅話又要洗，不如攞啲時間嚟休息仲好。 

12) 純水濕清潔棉 ✔
*餵母乳前作清潔用，我見有試用裝就帶埋去，到時唔啱用都可以用嚟抺手。 
*實際經驗：唔餵母乳都會有初乳滲漏，作清潔用

13) 衫夾 ✔

* 網友提點，用來夾衣服，上完廁所時要清洗傷口！
*實際經驗：雖然我開刀，不過都有用，廁所冇位俾你擺野，諗下自己一隻手攞住啲紙巾，另一雙手攞住件衫定條褲好？醫院啲產婦衣服真係好大件同好鬆，條褲唔捉實一定會跌落地⋯衫夾係必備 

14) 毛巾、牙膏、牙刷、杯、梳、面霜、潤唇膏 ✔

*實際經驗：日常梳洗用品，旅行裝得啦，大支又阻掟。

15) 乳頭霜

*餵母乳前使用
*我開刀，所以唔使用，不過我見其他順產媽媽都有用。

16) 保溫杯+炒米茶 4-5包 ✔

*實際經驗：裝定啲熱水，雖然醫院有水壺，不過耐咗一樣會凍，生完最好飲暖水。 炒米茶當水飲，陪月同媽咪都係咁講，所以保溫杯係必要嘅。 

17) 密碼鎖 

*所有野都係個櫃到，你去咗生，冇人幫你睇住，可以問問姑娘有冇鎖提供。 

18) 手提電話、外置充電器 ✔

*實際經驗：呢啲唔講都知要帶啦，醫院唔俾充電，帶定外置充電器實有用，最多用完叫屋企人再帶嚟。 

19) 銀包、八達通 ✔

*實際經驗：出院繳費係常識 。

20) 掛耳垃圾袋 5 個 ✔

*另一樣我好唔明點解要自備嘅野，都係果句，全間醫院嘅病房都有提供，膠袋好，紙袋又好，點都有，點解產科冇？唔通同BB換完片要行去丟垃圾？孕婦生完已經好攰，仲要爲呢啲野費心，產科病房真係好唔貼心。 

*實際經驗：一家要帶，初生BB成日要換片，唔想下下落床行去丟垃圾，垃圾袋係必備!!

21) 束腹帶(生完即用)  

*好多媽媽都話冇作用，最多用一兩次就唔用，不過我見講得嘅多數係啲瘦媽，我肥，所以都係有準備，希望有用啦！

*最後都係番屋企先用

係呢度為止，我冇準備任何淋浴用品，因為我比較傳統，相信生完最好唔沖涼唔洗頭嘅說法，忍得幾耐就幾耐。如果睇緊我文章嘅你唔相信都冇關係，可以自備架，醫院係可以沖涼洗頭架。 

嬰兒用品類：

22) 初生嬰兒紙尿片（試用裝） ✔ *我帶咗之前收到嘅試用裝去，都唔係一兩塊果啲，1包都有8塊，帶咗2包，其他叫老公之後帶嚟。  *實際經驗：我開刀，留院要俾順產嘅多1日，1日用10塊嘅話，咁都要40塊，所以之後直情叫老公攞包細NB嚟，多好過小。  23) 嬰兒用濕紙巾 1包 ✔ *清潔用，換片抺手都要用，特登帶包抺手口同patpat 都得嘅，方便。  *實際經驗：帶包大嘅，70/80/90片裝，抺便便用得多。 24) 棉花球 ✔ *清潔BB眼睛用  *實際經驗：又平又好用。 25) 紗巾4條   *備用，盡可能唔用，唔想係醫院洗野。  26) 嬰兒護膚膏 ✔ *實際經驗：換完片都要同BB搽下野啦。

第2個袋係BB展送嘅，幾大個，不過我覺得用料用手工唔錯，出院袋唔多野，但係都大件。同埋呢一袋老公第二日就攞嚟，所以有啲野本身係放A袋都變咗擺係呢一袋，廢事第一日入院攞太多野俾人話。

{B袋}：嬰兒用品及媽媽出院衣物  

嬰兒用品類：

1) 初生嬰兒紙尿片（1包正裝） ✔ *實際經驗：需要 2) 嬰兒用濕紙巾 1包 （20片）✔ *補給用 3) Mides 初生嬰兒出院套裝： ✔ 和尚袍(1件)、長身兩用袍(1件)、 手套(1對)、腳套(1對)、口水肩(2條)、紗巾(3條)、肚圍(1個)、厚/薄包被(1張) *睇當時天氣啦，我10月生，而家香港嘅10月都未凍，要兩手準備。  *實際經驗：當日我出院天氣轉冷同落雨，要老公再攞張厚包被俾BB。

媽媽用品：

4) 口罩 ✔ *實際經驗：出院用 6) 頸巾 ✔ *實際經驗：出院用 7) 帶帽長袖外套 1件 ✔ *實際經驗：出院用 8) 出院時衣服 1套 ✔ *實際經驗：出院用 9) 萬用紙 20 張 (摺好包起)  *補給 10) 掛耳垃圾袋 5 個 ✔ *補給 *實際經驗：出院用 11) 網褲 6 條  *補給

呢個就係第3個袋，我特地準備嘅，主要係放係車嘅，方便第時BB係車換片都可以立即有得用，唔使左摷右摷。 其實都可以放係BB車，兩用啦，最緊要就手!!

{C袋}：車上後備用品 

1) 初生嬰兒紙尿片  

2) 嬰兒用濕紙巾 1包 

3) 換片墊

4) 換片護膚膏

5) 紗巾3條 

6) 細垃圾袋 (換片用) 

屯門醫院嘅走佬袋list原來都有2個版本，一個係2012年，一個係2014年，我收到嘅係2014年，（而家都2017啦，好耐冇update 過），照list睇真係唔多野，比2012版本仲簡化咗啲，其實都係好架，要個孕婦大住個肚帶太多野入院都好辛苦，不過我覺得醫院應該要update一下個list 啦，2018都嚟緊喇，哈哈。 

2012年8月 版本

2014年12月 版本

最後都係果句，純粹個人分享，要啲咩就自行加減啦。